Kryeministri Edi Rama ka komentuar vendimin e Greqisë për t’u zgjeruar me 12 milje, duke u shprehur edhe një herë se për pjesën, ku ushtrimi i kësaj të drejte është i pamundur, ne jemi në gjyq me fqinjët.
Sa për deklaratat që Greqia është në avantazh në Gjykatën Ndërkombëtare, Rama i cilësoi dokrra.
Kujtojmë se ditën e djeshme kreu i PDIU, Shpëtim Idrizi deklaroi që Greqia në arenën dhe gjykatat ndërkombëtare është shumë më e fortë dhe lobuese, ndaj Shqipëria s’ka shanse të gjejë barazi aty.
“Unë besoj që ata që i fryjnë këtij zjarri janë të qëllimshëm. Shqipëria në vitin 1990 ka bërë të njëjtën gjë që po bën Greqia sot, e kam shpjeguar e rishpjeguar: Çdo shtet që ka dalje në det ka të drejtë të zgjerohet 12 milje përtej kufirit ekzistues, aty ku është e mundur. Shqipëria e ka ushtruar këtë të drejtë në vitin 1990 me dekret të Presidiumit të Kuvendit Popullor, e ka depozituar në maj ‘90 në Kombet e Bashkuara. Nuk rezulton që Greqia të ketë bërë ndonjë reagim apo deklaratë në atë kohë, se është e drejtë e çdo kombi.
Faktikisht ka qenë kërkesa jonë që në fillim që ta zgjidhim këtë punë me gjykatë dhe nuk donte pala greke, këto teoritë që ata atje janë në avantazh në Gjykatën Ndërkombëtare, janë dokrra. Sa herë teshtin apo kollitet dikush në Athinë këtu plas rrufa e madhe për arsye komplet të tjera nga e vërteta, për arsye lufte për pushtet kaq e thjeshtë është kjo. E kemi përsëritur 1 mijë herë se e drejta e 12 miljeve është e drejtë universale e çdo vendi që buron nga Konventa, Greqia e ushtron sot për arsye të veta që s’kanë lidhje me Shqipërinë, tani o unë jam agjent turk që luftoj me Greqinë, o jam agjent grek e luftoj me Turqinë, o në fakt jam ai që jam apo që jam realisht: Kryeministri i Shqipërisë që nuk i negocioj të drejtat e shqiptarëve. Është e turpshëm për një vend si i yni që bëhet kaq qesharak përmes gojëve të një presidenti e ish-Presidenti që edhe gjithë bota qesh me ne”,- tha Rama.
