Nga Artur Zheji
Vjen një çast që edhe një politikan, tashmë i sprovuar dhe i kujdesshëm si Rama, rrëshqet keq, nën trysninë e nervave të lodhura, duke përgojuar një nga deputetët më të rëndësishëm referencialë për Shqipërinë si Krichbaum.
Adelaide Feilcke, drejtoresha për Europën e radiotelevizionit shtetëror gjerman DW, në lidhjen skype për emisionin 360grade, la të nënkuptohej se Krichbaum, përpunon, raporton dhe filtron, tezat thelbësore, që lidhen me vizionin e Kancelares Merkel, për Ballkanin dhe Shqipërinë.
Duke sulmuar dhe duke u tallur me Krichbaum, kryeministri u lëshua pas gafave të njëpasnjëshme, tepër të kushtueshme.
Por mbasi i dha vetes kënaqësinë për të shkarkuar dozën e helmuar të ironisë dhe sarkazmës ndaj Krichbaumit, u ul më pas si një qingj i butë dhe filloi të bëjë një e nga një, detyrat që Merkel i dha, në takimin kokë më kokë…
Duke filluar me ish ministrin Tahiri, që e detyroi të dorëzojë, mandatin e deputetit.
Duke bërë, pra si një qingj i trembur nga ujku, “detyrat e prera dhe të qarta të Merkelit”, kryeministri tangërlliks në media dhe me gazetarët, dërgoi fill më pas, “qingjin” Tahiri, drejt e në thertore, me fjalët e ëmbla premtuese se nuk do therej, se ai do t’i thoshte një fjalë të mire, personit të duhur të fshatit që merret me therjet…
Nga ana tjetër, Tahiri, me instiktin e vetmbrojtjes në kulmin e vet, del në media me të drejtë, duke na futur të gjithëve në punë, për ta mbajtur në qendër të vëmendjes, që të mos e “therin” prapa krahëve, përpara se të shkojë në “thertoren” e certifikuar dhe të licensuar.
Tani Prokuroria e krimeve të Rënda, i ka duart e lira, të veprojë sipas provave dhe sipas ligjit, Tahiri ka “0” mbrojtje institucionale dhe e mban të lirë, vetëm sistemi i garancive të cilat do të verifikohen me kalimin e kohës, sa të qëndrueshme dhe të paepura, ato do të jenë.
Sidoqoftë, Shumica qeverisëse, ka një neps të madh, për ta bërë të heshtë përfundimisht Sajmen, ndaj të cilit u mblodhën të gjitha “mëkatet” e qeverisjes 5 vjeçare të Ramës, në mënyrë krejt të padrejtë, por tashmë kështu ndodh kur të “kapin”.
Në të vërtetë sot, nuk flitet më për tendera, shpërdorime, PPP-ra, konçesione grabitqare dhe tonelata kokainë që vijojnë të qarkullojnë në Shqipëri, sot flitet vetëm për Tahirin.
Në vetvete edhe vetëm kjo, është një sukses i madh për Ramën, që ka drejtuar mjeshtërisht vëmendjen, nga kriza e besimit që shqiptarët kanë tashmë edhe ndaj tij, tek Sajmja.
Superlojë për besë!
