Kryeministri Edi Rama ka prezantur ditën e sotme Ministrin e ri të Brendshëm Fatmir Xhafaj.
Gjatë evenimentit të organizuar për këtë rast Rama u shpreh i bindur se Xhafaj do të vijojë punën për reformimin e policisë së shtetit.
Gjithashtu Rama duke folur për luftën kundër kanabisit tha se 2017 do të jetë epilogu i kësaj historie.
“Pas shkatërrimit të republikës së turpit në Lazarat dhe rezultateve kundër kultivimit të kanabisit kemi të gjitha arsyet që ta konsiderojmë 2017 vitin që i vë kapak kësaj historie të gjatë, që nuk filloi në 2013, por që në 2017 janë të gjitha premisat që të ketë edhe epilogun e saj” , tha Rama.
Më tej Rama foli për paratë e krimit ku tha se janë sekuestruar 100 milionë euro pasuri kriminale dhe gjithashtu sipas tij është ulur edhe numri i vrasjeve. Ndërsa Ministri Xhafaj në fjalën e tij vlerësoi pozitivisht punën e bërë nga ish- ministri i Brendshëm Saimir Tahiri.
