Nga Ergys Mertiri
Studentëve po iu bëhet presion duke i kërcenuar se do të humbin vitin, nëse nuk kthehen në auditore. Një kërcënim të tillë e pohoi edhe vetë Kryeministri sot, ndërsa artikulonte retorikën e kulaçit dhe kërbaçit, duke pohuar se duke iu kthyer leksioneve gjërat rregullohen. Për këtë ka hedhur në aksion pikërisht dekanët që i sulmoi e kërcënoi egërsisht si njerëz të korruptuar e të fëlliqur. Janë po këta dekanë, të cilëve Rama iu kërkoi që të mos jenë në krah të qeverisë, pasi mbrojtja e tyre e turpëron atë, që sot po luftojnë me dhëmbë për të mbajtur qeverinë përballë rezistencës së studentëve. Pra, qeveria kërcënon dekanët, në mënyrë që ata të kërcënojnë studentët.
Në fakt, përvoja e këtyre ditëve tregoi se gjithçka arrihet vetëm në rrugë. Qeveria merr vesh vetëm me forcën e rezistencës dhe jo me dialog apo kthim në auditore. Në rrugë jeni të fortë dhe nuk ka asnjë shans të humbni vitin. Ka 5 vjet që jeni në auditore dhe gjendja është kjo që është. Ndryshimi filloi kur dolët në rrugë, ndaj duke u kthyer në mësim, thjesht humbisni forcën që keni. Nëse jeni të gjithë në shesh, ose të paktën jashtë auditoreve, për qeverinë ka një problem. Dhe për sa kohë për të ka një problem, ajo do jetë në presion për ta zgjidhur. Përkundrazi, nëse fryma e protestës bie dhe shuhet, për qeverinë nuk ka më një problem dhe nuk ka përse të mendojë më për ju, përveç se për propagandë.
