Ditën e sotme nisi diskutimi i komisionit për reformën zgjedhore. Një listë prej 36 kërkesash, është paraqitur para deputetëve të bëra bashkë e të përgatitura nga secila prej partive.
LSI-ja kërkon listat e hapura, socialistët janë kundër, por debati mes dy partive të mëdha, PS e PD, për votimin elektronik përfundoi me braktisjen e komisionit nga opozita.
“Partia Socialiste vrau reformën. Pa këtë reformë, zgjedhjet nuk mund të jenë të lira. PD mbështet dekriminalizimin dhe financimin e partive politike, por të gjitha mbeten një farsë në Kodin Zgjedhor dhe kanë impakt zero në votën e shqiptarëve. Me votimin elektronik, komisionerët partiakë nuk kanë më në dorë procesin. Ne duam që identifikimi i qytetarëve të bëhet me shenja gishtash, s’ ka nevojë për kartë identiteti”, tha Oerd Bylykbashi pas daljes nga Kryesia e Kuvendit.
Ndërsa Taulant Balla tha: “PD-ja kërkon të shmangë OSBE-ODIHR-in. Dy projektet-pilot që ndërtuam në vitin 2013 dështuan dhe kërkova që të gjejmë arsyet”.
