Kryetari i Kuvendit njëherësh dhe kryetari i LSI-së, Ilir Meta e cilësoi protestën e opozitës si paqësore dhe sipas tij kjo gjë është për t’u respektuar. Por, siç deklaroi Meta, nga kjo protestë nuk duhet të lëshohen ultimatume.
Gjatë deklaratës për shtyp që pati me homologun e tij kosovar Kadri Veseli, Meta foli për herë të parë për protestën e opozitës.
Ai tha ndër të tjera se çdo protestë që kërkon garantimin e standardeve më të larta të zgjedhjeve brenda të gjitha mundësive praktike që ekzistojnë, është një kërkesë që meriton vlerësim dhe dialog.
Protesta e opozitës tashmë ka hyrë në ditën e tretë të saj. Kërkesa kryesore e PD-së dhe e mbështetësve të saj në këto tri ditë ka qenë krijimi i një qeverije teknike, e cila sipas PD, do të mund të garantojë zgjedhje të lira dhe të ndershme.
