Në një intervistë për mediat, deputeti i Partisë Demokratike, Ervin Salianji tha se duhet inkurajuar SPAK dhe institucionet e drejtësisë për ti shkuar deri në fund çështjes së inceneratorëve. Salianji u shpreh se çdo protestë ashtu si dhe ajo që do të mbahet ditën e sotme pranë inceneratorit të Tiranës mbështetet nga opozita pasi është kundër keqqeverisjes.
“Çdo protestë në betejë me keqqeverisjen mbështetet nga ana ime dhe besoj se çdo deputet i opozitës. Duhet inkurajuar SPAK dhe institucionet e drejtësisë për t’i shkuar deri në fund çështjes së inceneratorëve. Secili prej përfaqësuesve ka qasje të ndryshme por asnjë nga deputetët e opozitës nuk është shprehur kundër protestës pastaj pjesëmarrja varet nga gjykimi dhe nga aktiviteti që ka. Pritshmëritë e qytetarëve janë të mëdha lidhur me çështjen e inceneratorëve. Ajo që kërkon opozita dhe opinioni publik në tërësi është që kësaj afere ti shkohet deri në fund. Janë të përfshira të gjitha institucionet e republikës. Nuk mund të goditen vetëm të dobëtit dhe të shpëtojnë ato që kanë hedhur firmat. Çdo denoncim i joni është inkurajim ndaj SPAK” – u shpreh Salianji.
Kujtojmë se protesta do të mbahet në orën 18:00 tek inceneratori i Tiranës.
