Pedagogia, Nora Malaj, ka komentuar sot procesin për zgjedhjen e presidentit të ri. Gjatë një interviste televizive ajo analizoi veprimet që po ndërmerren së fundmi për të identifikuar emrat kandidatë për postin e presidentit. Sa i takon emrave të propozuar në zarfe, një proces që vetë Rama e organizoi në grupin parlamentar të PS, Malaj u shpreh se kjo bëhej me qëllim tërheqjen e vëmendjes.
“Po të marrim analizën e garës dhe zarfit, kjo historia e zarfit më kujton emisionet e të dielave apo e të hënave që bëhen nga këta koleget tanë të mirë që e bëjnë për të vënë njerëzit në lojë dhe për të tërhequr vëmendjen. Kjo quhet “loja marciale”. I lë njerëzit në pritje të zarfit që nuk vjen kurrë”, tha ajo.
Jo vetëm kaq, pedagogia, shkoi më tej duke thënë se Rama kishte qëllim të shihte “hartën” e mbështetësve të tij brenda grupit parlamentar që në të ardhmen të bëjë më shumë përzgjedhje. “Ramës ia kemi dhënë të gjitha pushtetet. Në këtë gjë, Rama bën atë që quhet “tollovi”, po provon orekset e anëtarëve të tij dhe i fut në ngasje që kjo në aspektin psiko-social krijon një problematikë më të madhe. Sepse ai nuk ka qëllim zgjedhjen e presidentit. Ka arsyen për të parë se cila është harta dhe cilat janë grupet e tij që në një të ardhme të afërt t’i përzgjedhë”, u shpreh Malaj. Sipas saj, ky proces jo vetëm që nuk do të ketë transparencë por do të jetë i ndikuar politikisht dhe do përdoret nga qeveria për llogaritë e veta.
