Avokatët e Haki Çakos, vetëm një ditë pas pezullimit të tij nga detyra e kreut të Policisë së Shtetit, kanë apelur vendimin e gjykatës. Gjykata e Apelit pritet të shqyrtojë brenda afateve të përcaktuara, kërkesën për rrëzimin e vendimit për pezullimin nga detyra. Burime nga prokuroria bëjnë të ditur se Çako ka deklaruar se nuk ka pasur dijeni për mënyrën e regjistrimit doganor të paisjes që ka ardhur nga shteti fqinj, Italia. Gjithashtu, organi i hetimit bën me dije se, Çako është shprehur se pajisja është në gjendje të identifikojë numrin IMEI të çdo aparati telefonik. Sipas Haki Çakos, Policia e Shtetit Shqiptar dhe partnerët e saj, nuk ofrojnë trajnime në kundërshtim me Legjislacionin Shqiptar.
Po sipas burimeve nga organi hetimor, Haki Çako pretendon se aparatura nuk është përdorur në asnjë moment nga shtetas shqiptar, “por nga këqyrja e librit të hyrje daljeve në F.P.O. dhe nga pyetja e specialistëve të mbajtjes së librit rezulton se të paktën në dy raste automjeti ka qenë në posedim të shtetasit shqiptar Entiol Xhelilaj i vetëm. Pra shtetasi Haki Çako tregon se ka një inkoherencë të plotë me realitetin”.
