Përplasjet mes policisë dhe mbështetësve të opozitës në disa KZAZ në vend kanë sjellë edhe reagimin e OSBE-së në Tiranë.
OSBE shprehet se dënon me forcë aktet e dhunës pasi çdo përpjekje për të nxjerrë nga shinat procesin demokratik, përbën shkelje të ligjit dhe pengon përparimin e Shqipërisë.
Gjithashtu ky institucion ka apeluar ndaj opozitës, ku u kërkon drejtuesve të saj që tubimi i së premtes të zhvillohet në mënyrë paqësore dhe në përputhje të rregullat demokratike.
“Prezenca e OSBE-së i dënon me forcë sulmet e dhunshme të këtyre ditëve kundër organeve përgjegjëse për organizimin e zgjedhjeve, në disa bashki në Shqipëri. Të gjitha proceset politike dhe administrative duhet të zhvillohen në përputhje me parimet e shtetit ligjor.
Çdo përpjekje për të nxjerrë nga shinat procesin demokratik, përmes veprimeve të dhunshme, përbën shkelje të ligjit, pengon përparimin e vendit dhe njollos reputacionin e tij ndërkombëtar. Jo vetëm autorët e dhunës, por edhe nxitësit e saj, duhet të mbajnë përgjegjësi ligjore. Ne bëjmë thirrje që autoritetet shtetërore të ndërmarrin të gjitha masat, sipas legjislacionit në fuqi, për të hetuar dhe ndjekur penalisht përgjegjësit e dhunës.
Gjithashtu, u bëjmë thirrje organizuesve të protestës së të premtes të sigurojnë një protestë paqësore. Në përputhje me mandatin e saj, Prezenca e OSBE-së mbetet e gatshme të mbështetë shtetin ligjor dhe demokracinë në Shqipëri”-thuhet në reagim.
