Partia Demokratike ka reaguar pas thirrjes së Prokurorisë për detyrim paraqitje të kreut të opozitës, Lulzim Basha.
Sipas PD-së, kryeministri Rama po ushtron presion të paligjshëm ndaj drejtueses së Prokurorisë së Tiranës Elisabeta Imeraj për shoqërimin me forcë dhe arrestimin e kryetarit të opozitës.
Kryetari i opozitës ka konfirmuar vullnetin për tu paraqitur në prokurori sapo kjo e fundit të zbatojë ligjin për thirrjen e tij, reagon më tej Partia Demokratike.
“Ky presion kriminal përmes urdhrave të paligjshëm të prokurores së kapur Elisabeta Imeraj po ushtrohet me urdhër direkt të Edi Ramës me qëllim për të larguar vëmendjen nga përgjimet e reja që ka paralajmëruar se do të publikojë sot gazeta gjermane BILD.
Partia Demokratike paralajmëron prokuroren Imeraj dhe shefin e saj Edi Rama se ky skenar kriminal do të dështojë dhe ata do të jenë përgjegjës direkt për këtë veprim kriminal të paprecedentë të shkeljes së ligjit dhe provokimit ndaj opozitës.
Kamikazaja Imeraj nuk do ta shpëtojë dot Edi ramën. Asgjë nuk e shpëton dot Edi Ramën. As drejtësia e kapur prej tij”, thuhet në deklaratën e PD-së.
