Nga Ahmet Zani
Tregu i gjësë së gjallë në Milot, i njohur prej shumë vitesh, mbetet problem mjaft shqetësues, pasi nuk plotëson asnjë nga kushtet higjeno-sanitare. Tregtimi i produkteve me bazë shtazore bëhet në mes të baltës dhe mbeturinave që shkarkohen pranë rrugës kombëtare dhe linjës hekurudhore.
Qysh në orët e para të mëngjesit kafshë nga të gjitha origjinat dhe racat zbarkohen pranë qytetit të Milotit dhe ku të munden tregtarët kryejnë “pazaret” me bagëtitë. Në të tilla kushte është tërësisht e papranueshme tregtimi i kafshëve, duke sjellë një panoramë tronditëse. Të dielave në Milot vijnë gjithëfarë lloj ushqimesh, përpos gjësë së gjallë.
Nuk funksionon asnjë hallkë e institucioneve. Në shkresa ky treg konsiderohet i mbyllur, por askush nga tregtarët dhe konsumatorët nuk shqetësohet përballë këtij fakti.
E tillë është situata në tregun e Milotit, që ekziston që nga viti 1920, por të tillë degradim nuk e ka parë kurrë.
