Nga Aurenc Bebja
“Paris-Midi” ka botuar, të premten e 29 prillit 1938, në ballinë, një shkrim në lidhje me qëllimet e Mbretit Zog dhe Mbretëreshës Geraldinë për të vizituar Shtetet e Bashkuara të Amerikës, të cilin, Aurenc Bebja, nëpërmjet Blogut “Dars (Klos), Mat – Albania”, e ka sjellë për publikun shqiptar :
Mbreti Zog dhe Mbretëresha Geraldinë së shpejti do të nisen për në Shtetet e Bashkuara
Durrës, 29 Prill.
Mbreti Zog i dhe Mbretëresha Geraldinë kaluan ditën e parë të muajit të mjaltit në rezidencën verore të Durrësit, e cila mbikëqyr qytetin e vogël dhe ka pamjen mbi detin Adriatik.
Por tashmë thuhet se qëndrimi i çiftit të ri mbretëror do të jetë i shkurtër në Durrës dhe se mbreti Zog dhe gruaja e tij po planifikojnë shumë shpejt një udhëtim në Shtetet e Bashkuara.
Mbretëresha, edhe pse nëna e saj është me origjinë amerikane, kurrë nuk ka qenë në Shtetet e Bashkuara. Ajo dëshiron shumë të vizitojë këtë vend.
Nga ana tjetër, Mbreti Zog, i cili është një admirues i madh i Z. Roosevelt, pret me padurim të takohet me Presidentin e Shteteve të Bashkuara. Është një projekt që ai e ka përkëdhelur prej kohësh, por që nuk ka qenë në gjendje t’a realizojë deri më tani për arsye të angazhimeve të tij.
Ai dëshiron të përfitojë nga “pushimet” e tij për të vizituar vendin për të cilin i kanë folur kaq shumë tri motrat e tij, princeshat Maxhide, Ruhije dhe Myzejen, dhe gjithashtu për të falënderuar Kryqin e Kuq Amerikan dhe Fondacionin Rockefeller për punën humanitare që ata kanë realizuar në Shqipëri.
