“Rama u kërkon socialistëve të dalin në shesh e të mbrojnë përdhunuesin”
Kryetari i Grupit Parlamentar të PD, Edi Paloka tha pas dorëheqjes së kryebashkiakut të Kavajës se ai e ndërmori këtë hap pas ardhjes së dëshmisë së penalitetit nga Italia, ku dhe rezulton të jetë i dënuar për përdhunim. Në deklaratën e tij Paloka tha:
“Edhe më tronditëse bëhet e vërteta rreth të shkuarës kriminale të Roshit të Ramës, modelit të Edi Ramës për bashkitë. Dëshmia e penalitetit që është publikuar sot, e ardhur nga Ministria e Drejtësisë Italiane, thotë se Elvis Roshi është dënuar për “violenza carnale”, që do të thotë se është dënuar për përdhunim. Pra, Roshi që e fsheh, dhe shefi i Rilindjes që i del në mbrojtje, mbulojnë një krim të tmerrshëm të kryer nga i zgjedhuri i Ramës. Dhe Edi Rama e njeh italishten. E megjithëse e di, që ka vënë pos të tjerash edhe një përdhunues si kryetar bashkie në Kavajë, u kërkon sot socialistëve të dalin në një demonstratë në qytet për ta mbrojtur atë. Rama u thotë socialistëve të dalin të mbrojnë përdhunuesin. Demostratën do ta udhëheqë Gentjan Daja, i dënuar për trafik droge, ushtar i Roshit, të cilin Rama e ka caktuar në krye të PS-së së Kavajës. I poshtëroi duke ua vënë Roshin kryetar bashkie, i poshtëroi duke u vënë kryetar partie të dënuarin për drogë, po i poshtëron edhe më shumë sot duke i kërkuar të mblidhen në shesh në mbrojtje të përdhunuesit. Ky është Edi Rama. Ky është modeli i tij. Këto janë standardet e tij.”
