Takimi i së dielës për “Mini- Shengen ballkanik”, mes kryeministrit të Shqipërisë, Edi Rama, presidentit të Serbisë Aleksandar Vuçiq e kryeministrit të Republikës së Maqedonisë së Veriut, Zoran Zaev, në Ohër është një shfaqje e cila nuk paraqet rrezik për Kosovën, porse është e pakuptimtë për aq kohë sa vendet pjesëmarrëse nuk e njohin 17 shkurtin e 2008-tës.
Kështu është shprehur analisti politik, Abiniot Maloku, për KosovaPost, i cili thekson poashtu se mostrajtimi i barabartë, përjashtimi i Kosovës në këtë “shfaqje”, shpërfaqë se iniciativë e Mini-Shengenit nuk ka perspektivë.
Ai madje kujton edhe iniciativën e gjashtë vendeve të Ballkanit në 2013 e njohur si WB6, (Westren Ballkan 6, Ballkani Perëndimor 6’), iniciativë kjo e cila nuk u solli asnjë perspektivë.
“Në 2013 kur pati një promovim të WB6 (Ballkani Perëndimor 6), pata thënë se kjo iniciativë nuk është as e shëndetshme e as e mirë. WB6 nuk i solli asnjë perspektiv gjashtë shteteve të Ballkanit, të ashtu prezantuar Ballkani Perëndimor. Tani kur Serbia, Shqipëria dhe Maqedonia Veriore e nisën këtë shfaqjen e quajtur ‘mini-shengen’, në momentin kur Kosova u përjashtua nga trajtimi i saj i barabartë duke mos u ftuar qysh në takimin e Novi Sadit, për Republikën e Kosovës nuk ka perspektiv në të. E rrezikshme nuk mund të jetë përderisa ajo u përjashtua. Çdo iniciativë rajonale është e pakuptimtë për aq kohë sa vendet pjesëmarrëse nuk e njohin 17 shkurtin e 2008-ës”, ka deklaruar Maloku.
Ndërkaq, sa i përket pjesëmarrjes së kryeministrit të Shqipërisë, Edi Rama, në takimin e Mini-shengenit, Maloku thotë se Rama mund të ketë opinionin e tij lidhur me sjelljen e Kosovës në këtë iniciativë, por nuk mund të bëjë marrëveshje në emër të Kosovës.
“Kryeministri Edi Rama është përfaqësues i shtetit të Shqipërisë dhe ai nuk mund të bëjë asnjë marrëveshje në emër të shtetit të Kosovës, ose pa lejen e shtetit të Kosovës! Ai mund të ketë çfarëdo opinioni a mendimi se si duhet të sillet Kosova por kjo nuk e obligon asgje Republikën e Kosovës”, tha Maloku.
Ndërsa sa i përket rrezikut për një marrëveshje të fshehtë në mes të Ramës e Vuciqit, Maloku nuk është deklaruar duke dashur t’iu ikë spekulimeve, por thotë ai se Kosova duhet të refuzojë çdo iniciativë ku nuk trajtohet si palë e barabartë.
“Nuk dua të spekuloj se a ka ndonjë marrëveshje të fshehtë mes kryeministrit të Shqipërisë, Edi Rama dhe presidentit serb Aleksandër Vuçiq, për gjoja “ndarjen” e Kosovës! Ajo çka vlen të rekomandohet është që Kosova të mos frikohet të refuzojë çdo iniciativë që nuk e trajton atë si palë të barabartë! Kosova është shtet dhe si e tillë duhet të sillet, duke dëshmuar përkushtim për fqinjësi të mirë dhe heqjen e pengesave për lirinë e njerëzve dhe mallrave”, ka thënë Maloku për portalin Kosova Post.
Ndryshe, ditë më parë u zhvillua Samiti i dytë i vendeve të Ballkani Perëndimor. Por kjo nisëm nuk ka mbështetjen e Malit të Zi, Bosnje Hercegovinës dhe Kosovës që nuk morën pjesë ne takim. /KosovaPost/
