Me 24 korrik Ilir Metës i perëndon mandati si presidenti, ndërkohë që qeveria ka filluar procesin për përzgjedhjen e një të riu. Por, si duket LSI nuk do të rrijë duarkryq dhe fill një ditë më pas do të ndërmarrë një lëvizje të rëndësishme. LSI ka thirrur mbledhjen e Konventës Kombëtare, ku sipas Endrit Braimllarit do të bëhet një riorganizim të gjithë strukturave për zgjedhjet vendore të 2023.
Sipas LSI, Konventa Kombëtare do të marrë vendime shumë të rëndësishme politiko-organizative që lidhen me aksionin politik të zgjedhjeve vendore të vitit 2023. Gjithashtu do të thellohet procesi i brendshëm zgjedhor lidhur me ngritjen e strukturave drejtuese të LSI, proces ky i penguar prej kushteve të pandemisë gjatë vitit 2020. Në deklaratë thuhet se çdo lëvizje bëhet për të forcuar opozitën në vend.
“Në respekt të statutit të LSI-së pika 11.28, gërma B do të mbahet Konventa Kombëtare e LSI në datë 25 korrik 2022 e thirrur nga kryetarja e saj. Konventa do të jetë një moment historik për LSI dhe opozitën shqiptare në tërësi, për të ardhmen e përballje pa asnjë kompromis me regjimin e rilindjes për të hapur një epokë të re të një Shqipërie të çliruar nga krimi, korrupsioni dhe kapja e shtetit.
Në kuadër të organizimit të Konventës Kombëtarë të LSI që do të mbahet më 25 korrik është ngritur ekipi qendror i punës për përgatitjen e programit politik dhe ndryshimet statutore në statutin e LSI. Qytetarët kërkojnë një opozitë e cila përballet pa asnjë kompromis me regjimin rilindas, një opozitë e cila ka mbi çdo gjë interesin publik, një opozitë që denoncon korrupsionin, krimin dhe trafiqet, një opozitë që bën çdo sakrificë për qytetarët”, thuhet në deklaratë.
Të njëjtën ligjëratë ka përdorur edhe presidenti Meta, i cili është shprehur se pas Korrikut vendit i duhet një opozitë reale për tu vendosur përballë regjimit të Edi Ramës.
