Kryetari i Kuvendit Ilir Meta deklaroi nga Vjena se Bashkimi Europian nuk duhet ta shohë Ballkanin si një lagje, por një rajon i integruar në BE.
I pranishëm në konferencën me temë “Brexit, BE, SHBA dhe roli i Shqipërisë për stabilitetin dhe sigurinë në rajon” në Vjenë, Meta tha se dera e integrimit duhet të mbetet e hapur për të gjithë rajonin .
“Shqipëria mbështet plotësisht 3 prioritetet kyçe të Kryesisë Austriake të OSBE-së, gjatë vitit 2017 – duke ofruar mbështetjen tonë në drejtim të zbutjes së konflikteve të vazhdueshme, duke luftuar kundër çdo tendence fetare radikale në rajonin tonë dhe sigurisht duke punuar për forcimin e institucioneve tona, gjë që do të ndihmojë për kthimin e besimit të qytetarëve tek institucionet qeverisëse”, u shpreh Kryetari i Kuvendit.
Më tej Meta tha se Shqipëria po ecën përpara në mënyrë të qëndrueshme në rrugëtimin e saj drejt integrimit europian dhe se është një shembull pozitiv që dëshmon se integrimi në BE mund të shërbejë si një motor për procesin e reformave në vend.
“Shqipëria po bën pjesën e saj për të rritur standardet e qeverisjes dhe të tregojmë rezultate konkrete partnerëve tanë europianë. Reforma vendimtare dhe historike në drejtësi do të rindërtojë të gjithë sistemin e drejtësisë dhe shpresojmë ta riorganizojë për mirë. Kjo reformë kushtetuese historike do të forcojë shtetin e së drejtës, do të krijojë një sistem drejtësie më të paanshëm”, tha Meta.
