Fenomeni i përhapur, por fare pak i pranuar dhe i publikuar i dhunës me karakter seksual të vajzave dhe grave shqiptare. Lëvizja botërore #Me Too që lëkundi burrat e pushtetshëm dhe krahasimi që nuk po zë vend me mentalitetin tonë. A mund të jetë rasti Xhisiela një pikë nisjeje për “revolucionin e butë” për të drejtat e grave?
Bisedoi: Sebi Alla
1- Në vendin tonë janë fare të pakëta dhe krejt të papërfillshme denocimet për ngacmime apo krime seksuale, ndonëse shumë femra kanë rënë pre e këtij fenomeni. A duket sikur gratë dhe vajzat janë dyfish të dhunuara, që nënshtrohen dhe frikësohen nga denocimi ndaj burrave të pushteshëm të politikës, biznesit, apo edhe kategorisë së “të fortëve”? A është e rëndë edhe psikologjikisht heshtja për një grua të sulmuar, provokuar dhe në disa raste edhe detyruar që të jetë objekt i “krimeve seksuale”?
Mesila Doda – Sipas mendimit tim situata është edhe më e rëndë se kaq. Po ndërtohet modeli ideal i burrit, jo më djali i mirë që punon dhe siguron mirëqenie e dashuri për famijen dhe partneren e tij, po ai i të fortit që dhunon brenda e jashtë shtëpisë, që di të vjedhë të shajë të rrahë e të rrihet, që flirton me politikën e i mbledh votat e pastaj i kërkon haraçin. Përfundimisht, stereotipi i shoqërisë shqiptare është kthyer kokapjekthi, djemtë e këqinj janë princët e kaltër të kohës, e më pas këtë zgjedhje vajzat e gratë e paguajnë fort e shtrenjtë. Ky është realiteti, i cili sjell për pasojë që heshtja të jetë normalitet e krimi seksual të justifikohet si dëshirë për t’u vetëdjegur me cigare.
2- Përse në vendin tonë është kaq e vështirë të ketë reagim. Kujt i druhen gratë dhe vajzat? Mentalitetit (që shoqëria gjykon e paragjykon të dhunuarën), frikës nga abuzuesit, apo mosbesimit ndaj institucioneve ligjzbatuese?
Mesila Doda – Le të marrim rastin e fundit, atë të Xhensilës, rasti që për ekselencë shembi infrastrukturën shtetërore që mbronte një dhunues, i cili në këtë histori ishte jo vetëm i biri i deputetit, por edhe siç e dëshmoi me zë e figurë në një moment sinqeriteti, edhe mbledhësi i votave të kryeministrit. Kjo ishte arsye e mjaftueshme që ky i fundit t’i bindej dhe ta mbronte gjer në dëshpërim krimin e atyre që e sollën në pushtet dhe t’i justifikonte në çdo situatë. Pamë një viktimë që kërkoi ndihmë e u gjet para dyerve të mbyllura të shtetit. Pamë një oficer policie që u kanos me jetë nga keqbërësit e më pas u kërcënua rrugaçërisht edhe nga kryeministri, kur u quajt horr që nuk do i ndahej këmba këmbës duke promovuar një gjuhë toksike që është e denjë vetëm për trekëndëshin Rama, Rrahja dhe i biri. Mendoni që pas kësaj do ketë vajza e gra që do guxojnë të kërkojnë ndihmë tek një shtet që të mbyll derën fytyrës, nëse nuk je i fuqishëm e nëse nuk ke lidhjet e duhura? Kjo është një infrastrukturë e tërë që mbron dhunën e pushtetin e krimit e të flasësh për ndihmë për vajzat dhe gratë më duket luks i tepërt.
3- Lëvizja feministe në botë u rikthye fuqishëm pas një periudhe të gjatë dekadash përmes lëvizjes #Me too. Prej më shumë se një viti për këtë lëvizje janë ngritur pyetje të shumta nëse femrat sot ndihen më të mbrojtura, a vijojnë ta shikojnë interesin seksual mashkullor ende si kompliment e deri tek fakti nëse do të jemi në gjendje të ndërveprojmë në jetën e përditshme të punës së çdo njeriu që ndihet i ngacmuar, apo dhunuar seksualisht përmes forcimit të legjislacionit… Në këndvështrimin tuaj çfarë duhet bërë më shumë në këtë drejtim, me qëllim që lëvizje të tilla të mos mbeten vetem në kuadrin e denoncimit publik?
Mesila Doda – Sinqerisht, më duken si përralla me mbret këto për Shqipërinë. Kemi një kryeministër që etiketon median “kazan” e oficerin e policisë “horr”, që flet për opozitën duke i sharë më togfjalësha vulgarë si “derrat në llucë”. Kemi një polici që ende nuk gjen kamerat e personave që kanë hyrë në komisariat. Kemi shoqata të grave që heshtin e nuk bëzajnë për sa kohë nuk i jep urdher kryeministri… Në shqipëri fushata më e drejtë që duhet marrë jetë është #Vetëm ti hesht e kjo duhej drejtuar vetëm kundër një njeriu, inspiruesi i shtetit që shkrin si kripa në ujë.
http://www.mapo.al/a-mund-te-kete-nje-levizje-metoo-ne-shqiperi/
