Deputetja e PDIU, Mesila Doda ka kujtuar se propozimi i Blushit për zgjedhjen e Presidentit nga populli është vetëm një rikthim tek amendamenti i dhjetorit i vitit të shkuar i PDIU-së, i cili i kërkon zyrtarisht Komisionit të Reformës në Drejtësi zgjedhjen e Presidentit nga populli. Në atë kohë Blushi nuk pati reagim, por duket ligjvënësja është nisur nga parimi “më mirë vonë se kurrë”.
Ja reagimi i plotë i deputetes Mesila Doda:
“Falenderojmë kolegët që mbështesin opsionin tonë për zgjedhjen e Presidentit nga populli.
Po shoh një lajm që deputetët Blushi dhe Hafizi kanë deklaruar se do kërkojnë nga komisioni i Reformës, zgjedhjen e Presidentit nga populli.
Për dijeni te medias dhe të gjithë atyre që deklarojnë se kjo heq monopolin, ju bëj me dije se ky amendament është depozituar nga grupi parlamentar i PDIU qysh në dhjetor 2015 pranë komisionit të Reformës dhe ne sot nuk na mbetet tjetër vetëm të falenderojmë gjithë kolegët që i bashkëngjiten këtij opsioni dhe mendojnë që vizioni ynë për ndryshimet kushtetuese është zgjidhja më e mirë.“
