“Nuk mundet që kryeparlamentari Meta në vitin 2016 të kërkojë më pak nga ç’ka kërkuar kryeministri Meta në 1999, kur kërkonte kthimin e pronave dhe respektimin e konventave ndërkombëtare.”
Kështu deklaron deputetja e PDIU-së Mesila Doda, në një reagim të saj lidhur me deklaratat e kryetarit të Kuvendit Ilir Meta për Çështjen Çame, gjatë vizitës së tij në Greqi.
Deputetja e PDIU-së, i kujton Metës deklaratën që ai ka bërë, kur ishte kryeministër në vitin 1999 e kur kërkonte kthimin e pronave dhe respektimin e konventave ndërkombëtare për popullsinë çame. Mesila Doda kërkon nga të gjithë faktorët politikë shqiptarë të flasin njëzëri për Çështjen Çame, pas deklaratës së komisionerit të BE-së Johanes Hahn, një moment kur Brukseli si asnjëherë më parë e sheh Çështjen Çame jashtë agjendës dypalëshe dhe si një çështje të drejtave të njeriut që duhet zgjidhur. Çështja Çame, thekson deputetja Doda, nuk mund e nuk duhet të tentohet të futet edhe një herë në kalendat greke.
Deklarata e plotë
Me deklaratën e fundit të Komisionerit Hahn si asnjëherë më parë Çështja Çame doli nga korniza e marrëdhënieve dypalëshe. Brukseli u shpreh dhe kërkoi që të trajtohej në paketën e çështjeve që qëndrojnë pezull midis dy shteteve. Në këto kushte gjithë politika shqiptare do duhet të flasë me një zë të vetëm, Një dhe pa asnjë ekuivok, pa shprehje dykuptimshe e gjuhë të lidhur në takime zyrtare e aq më keq t’i jepet oksigjen qëndrimeve arkaike e agresive të Kotzias e gjithë të tjerëve që janë bashkëfajtorë, kur mbulojnë një krim genocidi të konsumuar nga paraardhësit e tyre. Çështja Çame është çështje e të drejtave të njeriut dhe nuk futet dot në kalendat greke me shprehje të tipit kemi qasje të ndryshme, sepse qasje të ndryshme kemi 100 vjet që i kemi patur për këtë çështje dhe pikërisht indiferenca e pafuqia e shtetit amë lejoi që të digjej e vritej një krahinë e tërë e një popull hero e martir.
Shteti shqiptar ka memorje të vetën në deklarimet dhe kërkesat zyrtare. Bash për këtë nuk mundet që një delegacion zyrtar i kryesuar nga kryeparlamentari Meta në vitin 2016 të kërkojë më pak nga ç’ka kërkuar kryeministri Meta në 1999, kur kërkonte kthimin e pronave dhe respektimin e konventave ndërkombëtare, kur ministri i jashtëm Panariti kërkonte para homologut grek që të fillohen diskutimet përkatëse për Çështjen Çame dhe kur Parlamenti i Shqipërisë miratonte Rezolutën Çame që është një akt zyrtar e i detyrueshëm.
Historia e Shqipërisë ka modele nga më të ndryshmet përgjatë udhëtimit të saj nëpër vite, ka Mujo Ulqinak, por ka edhe Esat Pashë Toptan. Varet kë model një politikan kërkon dhe zgjedh.
