Kryeministri grek Alexis Tsipras duke folur për negociatat me Shqipërinë, gjatë konferencës në panairin e Selanikut është shprehur prerë se çështja çame nuk ekziston.
Menjeherë pas kësaj deklarate ka reaguar Mesila Doda e cila u shpreh se “Para se të zhduket emri i Çamërisë, do zhduken tradhëtarët si Rama dhe aleati i tij strategjik Cipras”.
Mediat greke kanë publikuar qëndrimin e PDIU, duke cituar 27.al me shkrimin e mëposhtëm.
Doda deklaroi dje: “Ekstremisti i majtë, Cipras, tashmë i garantuar nga Rama edhe si partner strategjik, sot ka deklaruar që Çështja Çame nuk ekziston, se do marrë detin, varrezat, të drejtat për të gjallët e të vdekurit e tyre në këtë vend.
Po sot, partneri strategjik i Edi Ramës deklaron se nuk njeh masakrat, dëbimet, rrëmbimet, vrasjet e vjedhjen e pronave në Çamëri, madje guxon e shkon deri aty sa thotë se do heqë emrin “Çamëri” nga tekstet shqiptare…
Rilindja si vazhdimësi e politikës së kuqe të diskriminimit dhe krimit mbi popullsinë çame po ridimensionohet bindshëm. Bijtë e etërve që vranë popullsinë çame në Çamëri, së bashku me bijtë e etërve të kuq këtu, në Shqipëri që persekutuan për gjysëm shekulli popullsinë e martirizuar që erdhi të gjente strehë në shtetin amë, sot vendosin t’i zhdukin edhe emrin…
Por, sot duhet ta dinë mirë, e ta mësojë çdo pushtetar përgjegjës në këtë vend, që para se të zhdukni emrin, të drejtën e historinë e Çamërisë, do zhduket shumë më shpejt mbrapshtia, fara e urrejtjes dhe tradhëtisë që ata vetë mbollën e po rrisin përditë mbi kurrizin e Çamërisë martire. Ne nuk harrojmë!!!”
