Fotoja e tij bëri xhiron e botës, megjithatë 21 vite me pas, veterani i UÇK-së është krejt i lënë pas dore dhe në dëshpërim të plotë në skamje.
Nga Hashim Thaçi tek Edi Rama “Liria ka një emër”, por ka dhe një fytyrë që është Veli Morina. Kjo foto e ushtarit që përlotet, se toka e tij fitoi lirinë është shpërblyer me harresë.
Ai është 52-vjeç nga Gllareva e Klinës. Mban të varur në mur dy uniforma që i kishte veshur para dy dekadash: atë të UÇK-së dhe tjetrën të Ushtrisë Çlirimtare të Preshevës, Medvegjës dhe Bujanocit, ku shërbeu për një kohë më të shkurtër. Megjithatë, strehë për Veliun, gruan dhe tre fëmijët e tij shërben edhe një kasolle, e cila nuk është as e vetja, por pronë e xhaxhait të tij.
Vite më parë një mërgimtar bamirës nisi ndërtimin e një shtëpie të re për Veli Morinën, por punët mbetën në gjysmë në mungesë fondesh. Pos pagës së veteranit, prej 170 eurosh, ish-luftëtari mbijetesën e siguron edhe nga mbledhja dhe shitja e kanaçeve.
