Nga Andis Harasani
Letër nga Ferri për LuLin
Enver Hozha
Kabina 3, Seksioni: Ferr | 800 – 800 – 3 | [email protected]
Luli
Pasardhësi i pasardhësit
I dashur Luli,
Edin e ke shok të mirë. Jo po ta dish që e ke shok të mirë. Sa herë që ke probleme më shkruan i shkreti e më kujton të të shkruaj. E di, e di, që po thua me vete se është kaluar Edi tani dhe ndaj bën zemërgjërin, por mos harro se ç’ke kërkuar, as ty Ëngjëlli s’ta ka lënë pas dore. Të ndoqa dje në Konventë. E mbrojte shumë mirë vijën e klasave. Të dëgjoja dhe më bëhej mëlçia (se ju e dini që unë zemër s’kam) mal! Sa mirë që e keni lexuar atë librin që ju dërgova para shumë vitesh të dyve. E mo atë të voglin me titull: “Kalova lumin, të dhjefsha kalin”. Mehmeti se nuk lexoi atë bëri sikur vrau veten.
Prokopi që lëçiti statutin e ri më tha që e kishe bërë top. Thashë dhe unë ta lexoja njëherë, po ju e dini që unë veç ato revistat franceze me vajza me rroba banjo lexoj. Dhe ato jo se i lexoj po u shoh fotografitë. Këtë bëri dhe Edi ynë disa vite më parë. As e vrau mendjen se ç’thoshte statuti, derisa e pastroi partinë nga barërat e këqinj. Më thoshte atëherë gjithnjë: “Unë dua thjesht të mbaj trëndafilin”. Ma thoshte aq shpesh sa më bëri merak ca kohë, por më vonë e kuptova që kishte të drejtë qerratai.
Dhe ti ashtu bëje biri im. Ju lule nuk keni në logo, por ndoshta është momenti ta shtoni. Kështu si e bëre partinë pse të mos vësh një luledielli në logo? Ka dhe kuptim. Ti je lulja. Edi është dielli…
Tani dy këshilla kam unë për ty para se ta mbyll këtë kartë:
E para, merre nesër statutin dhe dërgo ndonjë te Tan Lame ta regjistrosh tapinë e partisë.
Dhe e dyta, ma largo nga partia atë shkrimtarin spanjoll, atë Ibsenin që hiqej si demokrat nga Kukësi.
I Edit dhe joti,
Me përzemërsi
EH
