Nga Mira Kazhani
E paprecedentë! Në historinë parlamentare nuk ka ndodhur kurrë që një grup parlamentar të ketë rrjedhje që në seancën e parë të kuvendit. Pa mbushur 24 orë Lulzim Bashës i dolën listat jashtë kontrollit ose e gjitha është një skenar politik që të çon të mendosh se PD nuk është ajo, për të cilën Lulzim Basha flet para kamerave.
“Bëni si them unë, po mos bëni si bëj unë”, është ajo shprehja e popullit të mençur që mund të zërë vend në këtë rast, gjithmonë, nëse 3 votat që dalin minus nga opozita e PD (ka një dyshim se mund të ketë abstenuar Tom Doshi, por asgjë e konfirmuar, e sigurt 100 përqind është se 2 demokratë votuan “komunistin” Ruçi.)
Opozita demokrate e ka nisur kështu kokulur opozitarizmin e saj në parlament duke lëpirë pikërisht aty, ku ka pështyrë më shumë dhe duke shkelur të paktën sipas demokratëve kauzën antikomuniste. Mjaft të sillen ndërmend dhjetëra akuzat e rënda të bëra ndaj Gramoz Ruçit.
Fundja siç kaloi dhe Fatmir Xhafaj mbi trupat e çadrës së Lulzim Bashës. Tani sot ka vetëm dy alternativa, ose Lulzim Basha bën sikur kur del para kamerave ose ai duhet të marrë përgjegjësi për listat e tij që ja nxinë faqen PD që në ditën e parë të kësaj legjislature të re.
Pas humbjes së thellë në 25 qershor, në daljen e parë Lulzim Basha tha publikisht se listat janë përgjegjësia e tij. Të njëjtën gjë tha edhe në fillim të fushatës, kur u shënjestrua nga shumë demokratë për emrat anonim dhe përjashtimin e shumë figurave. Ky paska qenë fati i Bashës: të jetojë mes tradhtarësh.
Këta të rinjtë kush janë tani dhe me kë flirtojnë që ju raftë pika!
/tiranapost.al/
