Kryeministri i vendit Edi Rama dhe kryetari i Partisë Demokratike Lulzim Basha do të zhvillojnë sot një takim në orën 10:00 me ftesë të presidentit të Republikës Bujar Nishani.
“Ju njoftojmë se sot dt. 3 maj 2017, ora 10:00 me ftesë të Presidentit të Republikës do të zhvillohet në Presidencë takimi midis Kryeministrit të vendit z. Edi Rama dhe Liderit të Opozitës z. Lulzim Basha” informoi presidenca përmes një njoftimi të shpërndarë për median mesnatën e 2 majit 2017.
Ndërkohë kryetari i PD-së Basha pasi doli nga mbledhja e grupit tha se nuk kishte diskutuar me Presidentin për modalitetet e takimit, por nënvizoi se nuk hiqte dorë nga kushti i qeverisë teknike pa Edi Ramën kryeministër.
Nga ana tjetër burime nga mazhoranca bënin me dije se kryeministri Edi Rama ishte i gatshëm të takohej që mbremjen e së martës (2 Maj) me liderin e Partisë Demokratike, Lulzim Basha.
Sipas këtyre burimeve, Kryeministri nuk pranonte zvarritjen e negociatave, ndërkohë që sot nis fushata për zgjedhjet parlamentare të 18 qershorit.
Pasditen e së martes, Presidenti i Republikës Bujar Nishani i drejtoi një ftesë publike liderit të opozitës Lulzim Basha dhe kryeministrit Edi Rama që të ulen në tryezën e dialogut për t’i dhënë fund krizës politike.
