Pas disa takimesh edhe i djeshmi mes Vetëvendosjes dhe LDK-së përfundoi pa një marrëveshje për të formuar qeverinë. Ndërkohë, VV njoftoi se takimi i radhës do të jetë sot me prezencë edhe të ambasadorëve të QUINT-it si dhe shefes e misionit të BE-së në Prishtinë.
I ftuar në “Abc-ja e mëngjesit”, me Enkel Demin, përkthyesi Ben Andoni u shpreh se VV dhë LDK janë shumë larg programeve të tyre dhe fakti që nuk ndajnë postet tregon se ky koalicion nuk është natyral.
“VV bashkë me LDK kanë treguar se janë shumë larg programeve të tyre. Pak ditë më parë u realizuar marrëveshja për shërbimin ajror mes Prishtinës dhe Beogradit. Të dyja partitë nuk janë deklaruar sot e kësaj dite. Aspekti që nuk ndajnë postet tregon se ky koalicion nuk është natyral.”, tha Andoni.
Nga ana tjetër sipas tij nuk do të ketë zgjedhje të reja në Kosovës, pasi VV është e interesuar të provojë veten në pushtet.
“Militantët e VV kanë vite që përballë luftës së vështirë që bëjnë , presin benefite në këtë moment. Nuk do ketë zgjedhje të reja, sepse është e kushtueshme për Kosovën. VV do të bëjnë lëshime të mëdha, jo se ka frikë nga zgjedhjet por do të provojë veten në pushtet. Kam përshtypjen se partitë shqiptare fillojnë rehatohen kur janë në pushtet”, tha ai./abcnews.al
