Nga Arben Llalla
Konica është një qytezë e banuar nga shqiptarë dikur tërësisht, por edhe sot gjen familje greke me origjinë shqiptare. Në vitet 1991, atje kam takuar edhe një shtetas grek mysliman, i cili ruante ende kombësinë shqiptare dhe nuk e kishte ndryshuar nga presionet shtetërore, siç kishte ndodhur me shqiptarët ortodoksë.
Ky shqiptar quhej Ibrahim, kishte një kafene në qendër të Konicës. Gjatë vizitave të mia në Konicë kam takuar edhe myslimanë të tjerë, shtetas grekë, të cilët identifikoheshin zyrtarisht si grekë, por nën zë pranonin se ishin shqiptarë.
Xhamia e Konicës para tërmetit të vitit 1996
Konica e botuesit dhe publicistit të madhit, Faik Konica gjatë pushtimit osman i përkiste Kazasë së Korçës dhe Sanxhakut të Janinës. Megjithëse ky vendbanim shqiptar është pushtuar nga osmanët më 1417, xhamia e parë në Konicë sipas të dhënave është ndërtuar diku më 1492, e quhej xhamia Husein Shah. Kjo xhami u ndërtua nga Sulltan Bajaziti i II, gjatë kohës kur erdhi me ushtrinë e tij në Epir për të shtypur kryengritësit shqiptarë.
Tyrbe në Konicë
Në këtë qytezë është ndërtuar për nder të Sulltan Sulejmanit një xhami dhe më vonë edhe tre Tyrbe. Xhamia e Sulltan Sulejmanit është ndërtuar në shekullin XVI dhe i ka rrezistuar shkatërrimit nga natyra pjesërisht deri më sot. Një pjesë e minares ra gjatë tërmetit të vitit 1996. Afër xhamisë Suljeman gjendet edhe një Tyrbe, e cila është e ruajtur mirë. Po aty është edhe varri i një kleriku të lartë. Në qendër të Konicës ka edhe dy Tyrbe të ndërtuara në fund të shekullit XVIII, të cilat sot janë prona private dhe nuk janë në gjendje të mirë. Njëra nga Teqetë u ndërtua për nder të Baba Hysenit. Teqeja e dytë u ndërtua për nder të Sheh Isak dhe Abdurrahamnit.
