Kreu i grupit parlamentar të PS-së Taulant Balla ka paraqitur kërkesën për shkarkimin e Kreut të Shtetit në Komisionin e Ligjeve.
Kreu i Komisionit të Ligjeve, Ulsi Manja tha se Presidenti është njoftuar për kërkesën dhe se nëse dëshiron mund të paraqitet në komision. “Presidenti i Republikës është njoftuar nga Kryetari i Kuvendit. Do ta dëgjojmë Presidentin në Komision nëse dëshiron. Do të ngremë komision hetimor”, deklaroi Manja.
Balla tha se dekreti i Presidentit është në kundërshtim me parimet kushtetuese dhe se ka cenuar sovranitetin e popullit.
“Presidenti nxori dekretin për anulim të datës 30 qershor për zhvillimin e zgjedhjeve lokale. Me anulimin e datës, duke e konsideruar si shkelje të rëndë të Kushtetutës, kemi depozituar kërkesën për shkarkim. Dekreti vjen në kundërshtim të hapur me parimet kushtetuese pasi është cenuar rëndë sovraniteti i popullit. Presidenti ka cënuar rëndë Kushtetutën si akti më i lartë në Republikën e Shqipërisë.”, deklaroi Balla.
