Votimi elektronik bën bashkë Koçon me Partinë Demokratike
Ish-deputeti Koço Kokëdhima është në një mendje me PD-në për votimin elektronik. Sipas Kokëdhimës, votimi elektronik do të shënonte një progres të madh drejt shëndoshjes së sistemit politik dhe institucioneve kushtetuese
“Shqipëria ka një sistem politik e kushtetues jofunksional, pothuajse të kalbur dhe të korruptuar. Kjo situatë e ka fillesën te sistemi i pabesueshëm elektoral. Në Shqipëri politika nuk është një treg i hapur, ku do të konkuronin lirshëm platformat, idetë, programet, alternativat dhe individët. Administrimi i procesit të votimit dhe numërimi i votës janë lehtësisht të cënueshëm dhe me kosto të larta për shoqërinë.
Për këtë arsye vazhdojnë të rrinë në treg partiçka dhe individë që në politikë s’kanë asnjë mision tjetër veçse të bëjnë fitime përmes korrupsionit. Votimi elektronik do ta lehtësonte Shqipërinë nga kjo situatë dhe do të shënonte një progres të madh drejt shëndoshjes së sistemit politik dhe institucioneve kushtetuese. Pa një sistem elektoral të pastër e të besueshëm , asnjë reformë tjetër e sistemit kushtetues, nuk do të japë rezultatet që do të dëshironim”, është shprehur Kokëdhima.
Për këtë kërkesë të PD-së, e cila mbështetet edhe nga Koço Kokëdhima, Partia Socialiste nuk ka ende asnjë reagim zyrtar.
