Ralf Gjoni: beteja kunder cdo lloj ‘betonizimi’ duhet te vazhdoje
Këshilltari i kryetarit të Kuvendit, bën thirrje për protesta kundër bashkisë për projektin tek Parku i Liqenit. Këshilltari i Metës për marrëdhëniet me jashtë, Ralf Gjoni, e cilëson ecurinë e punimeve tek parku i liqenit, pasojë e arrogancës së bashkisë Tiranë, e cila injoron legjislacionin, përbuz shoqërine civile dhe tallet me ndjeshmerinë qytetare. Përmes një mesazhi në facebook, Ralf Gjoni, bën thirrje për vazhdim të protestave kundër ndërtimit të këndit të lojrave tek parku i liqenit.
Këshilltari i kryetarit të Kuvendit, publikon edhe nje fotografi ku duket betoni që po hidhet në Parkun e Liqenit. “Doja të prisja 2 prillin për t’a postuar këtë foto për t’ju sensibilizuar miqte e mi se kjo pacavure betoni e hekurash që po ngrihet dhe thellohet dita ditës në Parkun e Tiranës nuk është mashtrim – është totalisht prej vërteti. Ky nuk është thjesht rezultati i shemtuar i idiotësisë së një arkitekti anti-mjedisor – totalisht i pandjeshëm ndaj nevojave të Tiranës, por mbi të gjitha pasoje e një arrogance të paskrupullt e cila injoron legjislacionin, përbuz shoqërinë civile dhe tallet me ndjeshmërinë qytetare. Ndaj dhe beteja kundër cdo lloj ‘betonizimi’ duhet të vazhdojë…”, shkruan këshilltari i Metës.
