Eksperti i ekonomisë Dritan Shano, i ftuar në “Abc-ja e mëngjesit”, u shpreh se tashmë është krijuar ideja se pandemia COVID-19, mund të menaxhohet me politikë, por kjo sipas tij është e dëmshme për ekonominë dhe shëndetësinë.
Gjatë diskutimit më gazetarin Enkel Demi, ai theksoi se sot nuk ka prova që izolimi i ekonomisë ka prodhuar ruajtje të jetëve, por janë humbur më shumë jetë për shkak të vetëvrasjeve apo sëmundjeve të patrajtuara.
Shano i qëndroi mendimit se një izolim tjetër do të ishte katastrofë për qytetarët, ndërsa bëri apel që të mos shkohet në një mbyllje të dytë dhe kryeministri të tërhiqet nga një qëndrim i tillë.
“Është krijuar ideja se virusi mund të mundet me mjete politikave dhe administrative Kjo është një formë diktature më ekstreme, gjithë pandemia ka eliminuar debatin, nuk ka më debat. Nuk ekziston asnjë metodë magjike që një virus kur shfaqet të eliminohet. Çdo virus kur ka dalë për herë të parë është sjellë gjithmonë në këtë formë. Të lindurit e 2020 apo 2021 do e kenë paketë virusin në trupin e tyre. Masat që duhet të marrë një qeveri kudo në botë, duhet të jenë masa serioze. Duhet kuptuar se kush janë grupmoshat që godet më shumë virusi. Nuk mund të përdorësh të njëjtën kurë për të gjithë njerëzit. Theksoj se do të ishte katastrofë për shqiptarët një izolim i dytë”, tha eksperti i ekonomisë.
Po ashtu ai u shpreh se shoqëria shqiptare nga pikëpamja ekonomike dhe sociale, nuk e përballon dot më një izolim të dytë.
“Shqipërisë nuk i duhet një Komitet Ekspertësh që kanë një mendim ndryshe. Sot që flasim shqiptarët po harxhojnë kursimet e tyre të fundit. Shqiptarët nuk kanë më asnjë yndyrë në portofol dhe për këtë arsye i them kryeministrit të mos shkojë në një mbyllje të dytë. Individ shqiptar është i pasigurt se çfarë mund të ndodhë”, tha më tej Dasho.
