Kryetari i Partisë Drejtësi, Integrim dhe Unitet, Shpëtim Idrizi, dhe deputetja e PDIU-së, Mesila Doda si edhe kryetari i Shoqatës “Çamëria” zhvilluan dje një takim me përfaqësues nga Presheva, Bujanoci dhe Medvegja.
Kreu i PDIU-së deklaroi se është detyrë funksionale e Shqipërisë që të kujdeset për të gjithë shqiptarët, të cilët janë jashtë atdheut.
“Ne nuk e shohim këtë si folklorizëm apo ndryshim kufijsh, por është një proces, për të cilin duhet të fillojmë të punojmë. Duhet të bashkëpunojmë më shumë me shqiptarët që jetojnë jashtë kufijve, në arsim, në ekonomi dhe shumë fusha të tjera. Edhe në Kushtetutën e Shqipërisë parashikohet qartë që të punohet për bashkimin e shqiptarëve“, u shpreh Idrizi.
Gjithashtu Idrizi vuri theksin tek rritja e trysnisë në mënyrë që shqiptarët e Preshevës, Bujanocit dhe Medvegjës të kenë më shumë të drejta në territorin ku jetojnë.
“Ne nuk duam që historia të përsëritet për shqiptarët, ashtu siç ndodhi me shqiptarët e Çamërisë. Pra, pamundësia për të jetuar aty, t’i detyrojnë për ta braktisur atë vend“, tha Idrizi.
Përfaqësuesit nga Presheva, Bujanocit dhe Medvegjës kërkuan mbështetjen e deputetëve të PDIU-së, që projekti i Rrugës së Kombit që do të vijojë deri në Serbi, të përshkojë dhe territorin e Medvegjës.
Kreu i PDIU-së, Idrizi dhe deputetja Mesila Doda theksuan se do ta mbështesin këtë projekt.
