Kryetari i PDIU-së Shpëtim Idrizi, ka marrë pjesë në aktivitetin e mbajtur për 28-vjetorin e krijimit të Shoqatës Patriotike “Çamëria”.
Kreu i PDIU deklaroi se shqiptarët po largohen çdo ditë e më shumë nga vendi që po vuan krizën demokratike, nga një qeveri që ka vrarë shpresat e një populli. Por Idrizi ka një këndvështrim kritik edhe për opozitën, pjesë e të cilës është edhe PDIU.
“Të gjithë kanë dyshimin nëse opozita është e aftë që jo thjesht të denoncojë përditë. Studentët nuk duhet t’i linin vetëm. Opozita nuk duhet të fuste duart, por kokën edhe shpirtin për t’i mbështetur studentët që janë ngritur sepse e dinë që prindërit nuk kanë mundësi t’i çojnë në shkollë. Opozita duhet të ishte e bashkuar dhe e qartë dhe jo vetëm për të denoncuar.
Opozita duhet t’i jepte përgjigjie pyetjeve që kanë shqiptarët. Ça do bëjmë me ekonominë, arsimin, kulturën? Ça do bëjmë sot dhe jo nesër. Unë nuk e kuptoj dot se si mund të merret vendim për të hequr Edi Ramën. A ka detyrë tjetër opozita? Nuk di të ketë detyrë tjetër.
Opozita ka detyrë që kur vendi keqqeveriset të japë alternativën se përse do të vijë në pushtet dhe të bëjë gjithçka për t’i dalë zot shqiptarëve. Nuk di opozitë në botë të marrë vendim për protestë, protesta është në ADN-në e saj.
Opozita shqiptare, pjesë e të cilës jemi edhe ne, duhet sot të japë alternativën se përse do të vijë në pushtet. Duhet të jetë pa kompromis, jo thjesht dhe vetëm për të hequr një njeri dhe për të sjellë një tjetër, por për ta ndryshuar konceptualisht gjithë qeverisjen”, tha Idrizi.
