Kreu i PDIU-së deklaron propozimet e Paktit Kombëtar dhe ka një mesazh për mazhorancën e opozitën: Konflikti permanent i shërben dy palëve për të fshehur paaftësinë e tyre për të avancuar drejt konsolidimit të demokracisë në Shqipëri.
“Rama e Basha duhet të ulen në bisedime për të zgjidhur krizën e për të futur vendin në hullijtë e kushtetueshmërisë.”
Ky është mesazhi që kryetari i PDIU-së Shpëtim Idrizi, i ka adresuar kryeministrit Rama dhe kreut të opozitës, Lulzim Basha. Referuar krizës politike që ka mbërthyer sot vendin, kreu i PDIU-së ka paraqitur Paktin Kombëtar me pesë pika, ku spikat reforma në drejtësi, reforma zgjedhore, ndryshimet në sistemin zgjedhor ku propozohet një zonë elektorale që do të thotë proporcional kombëtar dhe më pas, krijimi i koalicioneve pas zgjedhjeve. Kreu i PDIU-së propozon rritje të anëtarëve të komisionit të numërimit të votave, ku të përfshihen partitë parlamentare dhe njëherësh depolitizim të komisioneve zgjedhore. Si garanci për zgjedhjet e 18 qershorit, Idrizi sheh prokurorinë speciale pranë KQZ, dhe ky është një ndër propozimet që përbëjnë paketën e PDIU-së. Financimi i partive parlamentare nga buxheti i shtetit është një tjetër kërkesë e kësaj partie bashkë me zgjedhjen e presidentit nga populli që është një propozim i hershëm i PDIU-së e që vjen sërish si pjesë e kësaj pakete me propozime të përmbledhura në atë që quhet pakt kombëtar.
Sa i përket pikës së parë, atë të nevojës për dialog mes mazhorancës dhe opozitës, kreu i PDIU-së thekson se konflikti mes mazhorancës dhe opozitës është i pandërprerë gjatë gjithë tranzicionit. Ky konflikt permanent thekson Idrizi, i shërben dy palëve për të fshehur paaftësinë e tyre për të avancuar drejt konsolidimit të demokracisë në Shqipëri. Në këto kushte, kreu i PDIU-së i kërkon kryeministrit Rama dhe kreut të opozitës Lulzim Basha, të ulen në bisedime për të futur vendin në hullijtë e kushtetueshmërisë pasi kriza politike, parlamentare po dëmton rëndë Shqipërinë dhe integrimin e saj në Bashkimin Europian.
