Kryetari i PDIU-së u ka bërë thirrje krerëve të opozitës e mazhorancës të kapërcejne ato pengesa që kanë mbetur për të miratuar Reformën në Drejtësi
Kryetari i PDIU-së, Shpëtim Idrizi, e ka cilësuar si lojë postierësh letërkëmbimin mes kryeministrit Rama e kryetarit të PD-së, Basha për dialogun për reformën në drejtësi. Në një intervistë në News 24 Idrizi tha se ka ardhur koha që reforma në drejtësi të përfundojë duke theksuar se ajo është pjesa e moralit të institucioneve shqiptare.
Idrizi është shprehur se është me rëndësi që palët të bien dakord për të miratuar reformën në drejtësi duke theksuar se çështja e pretendimeve të opozitës për zbatimin e kushtetutës është çështje e interpretueshme nga shumica. Megjithatë ai thekson se tashmë dy deputetët, për të cilët kërkohet nga opozita që mandati i tyre të kalojë në Kushtetuese, e kanë zgjidhur problemin. Rakip Suli e Valentina Leskaj kanë kërkuar vullnetarisht që mandati i tyre të kalojë në Gjykatën Kushtetuese.
Kreu i PDIU-së i bëri thirrje mazhorancës dhe opozitës të bashkëpunojë për të kapërcyer edhe ato pak pengesa që kanë mbetur në rrugën drejt miratimit të reformës në drejtësi.
