Një ditë më parë, deputetët e PDIU-së nuk i votuan dy ministrat e rinj të qeverisë Rama
Kryetari i PDIU-së Shpëtim Idrizi ka bojkotuar tryezën e sotme të koalicionit qeveritar. Një ditë më parë, deputetët e PDIU-së nuk votuan miratimin e dy ministrave të rinj të qeverisë Rama. Aresyet e kësaj vote të munguar për qeverinë dhe bojkoti i sotëm i tryezës së koalicionit, lidhet me pakënaqësitë për qasjen e diplomacisë shqiptare në lidhje me çështjen çame, mungesën e presionit mbi Athinën për ligjin e luftës dhe faktin e nënshtrimit për varrezat e ushtarëve grekë të luftës italo-greke, ndërkohë që nuk ka një përgjigje për ngritjen e varrezave të çamëve të vdekur gjatë genocidit të 27 qershorit 1944. Kryetari i PDIU-së pati një javë më parë një debat të fortë në Kuvend me ministrin e Jashtëm, Ditmir Bushati, i cili nuk pranoi të bëjë një notë proteste ndaj Athinës pas një konference të organizuar në Ministrinë e Jashtme Greke për Vorio Epirin, term ky irredentist.
Një tjetër arsye e votës së munguar për qeverinë dhe bojkotit të tryezës së koalcionit, lidhet edhe me refuzimin e Kuvendit për të shqyrtuar projektligjin Idrizi-Doda për heqjen e dekoratave Enver Hoxhës dhe krimineëlëve të tjerë të komunizmit. Gjithashtu, PDIU gjen se implementimi i marrëveshjes mes mazhorancës dhe PDIU ka ecur me hapa tejet të ngadaltë si në nivel qendror, ashtu dhe në nivel vendor.
Ndërkohë, krerët e mazhorancës Rama e Meta janë mbledhur në tryezën e përjavshme të koalicionit në vilën 30.
