Pas vizitës së kryeministrit Rama në Beograd, ku ndër të tjera janë prekur edhe çështja e njohjes së pavarësisë së Kosovës dhe ajo e kompleksit metalurgjik të “Trepçës”, ka reaguar ministri i Jashtëm kosovar, Enver Hoxhaj, i cili tha se Kosova nuk ka nevojë për mbështetjen e Tiranës për dialogun me Serbinë.
Gjatë prononcimit të tij për televizionin ART në Maqedoni, Hoxhaj tha se për këtë punë, Kosova ka mbështetjen amerikane dhe europiane, ndërkohë që duke komentuar bashkëpunimin Beograd-Tiranë, kryediplomati kosovar ka theksuar se kjo është çështje bilaterale e këtyre dy vendeve.
Madje Hoxhaj ka shkuar më larg duke thënë se Shqipëria nuk është aktor global dhe Kosova natyrisht kërkon ndihmën amerikane apo të BE-së, por jo të dikujt tjetër.
