Dy persona kanë vdekur dhe më shumë se 100 kanë mbetur të plagosur në ishullin grek Kos, në Detin Egje, për shkak të një tërmeti të fuqishëm me magnitudë 6.7 ballë të shkallës Rihter me epiqendër mes qytetit turk pranë brigjeve të Bodrumit dhe ishujve grekë.
Në Kos, njerëzit janë trembur dhe kanë lënë shtëpitë për të dalë në rrugë. Turistët që ndodheshin në hotele, kanë vendosur ta kalojnë natën në qiell të hapur, duke nxjerrë shtretërit në natyrë dhe parqe.
Viktimat janë dy: njëri me kombësi turke dhe tjetri me kombësi suedeze. Të dy kanë vdekur nga shembja e tavanit të një bari, ku ndodheshin në momentin e lëkundjeve sizmike.
Në Kos, po ashtu janë dëmtuar shumë ndërtesa të qendrës historike, mes të cilave edhe xhamia e vjetër dhe fortesa e shekullit të XIV që ndodhet në hyrjen kryesore të qytezës.
