Në një intervistë për emisionin “Opinion”, avokati i ish-Presidentit të Kosovës, Hashim Thaçi, është shprehur se gjyqi në Hagë mund të zgjas deri në 10 vite. Dastid Pallaska ka deklaruar se edhe nëse ish-Presidenti i Kosovës shpallet i pafajshëm nuk mund të kërkojë dëmshpërblim për arrestimin.
Ai gjithashtu theksoi se me ritmin që po ecën procesi gjyqësor ndaj Thaçit por dhe ish-zyrtarëve të tjerë të lartë, gjykimi mund të zgjasë edhe mbi 10 vite.
“Më këtë mënyrë menaxhimi të prokurorisë po, absolutisht po. Baza ligjore për të kërkuar një kompensim nëse dalin të pafajshëm nuk është e qartë. Kompensimi bëhet kur arrestohet dhe paraburgoset në mënyrë të kundërligjshme. Në këtë rast është kërkuar nga gjykata” – tha Pallaska.
Kujtojmë se Prokuroria Speciale në Hagë ngriti një aktakuzë më 24 qershor 2020 dhe e paraqiti atë në gjykatën speciale kompetente kundër Thaçit dhe ish-kryetarit të Parlamentit Veseli për “krime kundër njerëzimit” dhe “krime lufte” gjatë luftës në Kosovë (1998-1999). Personat e përmendur në aktakuzë konsiderohen përgjegjës për vdekjen e 100 personave dhe akuzohen gjithashtu për krime lufte të tilla si vrasje, internim dhe torturë.
