Sekretari i Përgjithshëm i PS, Damian Gjiknuri ka deklaruar ditën e sotme se njerëzit që kishin dalë në protestë ishin përdorur nga Berisha që ky i fundit të legjitimonte veten në krye të PD-së. Në takim me strukturat e PS në Njësinë 6, Gjiknuri u shpreh se i dukej sikur protesta ishte koordinuar me opozitën në Maqedoni kundër integrimit evropian.
“Ne jemi dëshmitarë të ndryshimeve që kanë ndodhur, po këto nuk kanë ardhur rastësisht. Nuk duhet t’i lemë asnjëherë në mes ato. Kujt duhet t’ia lëmë, atyre që dalin në shesh? Ata dalin se ai tjetri do të legjitimojë veten e tij, atë hall ka. Jo se pret të fitojë pushtetin nga rruga. Nganjëherë madje më duken të koordinuara, se del proteston Opozita në Maqedoni kundër integrimit Europian, duket sikur ka lidhje. Kështu bën dhe ky zotëria jonë këtu në Tiranë. Nuk dua të bëj konspiracione, po rastësitë nuk janë gjëra që duhen shmangur. Pra ka një rastësi me një plan konkret, megjithatë unë nuk dua të bëj nga ato spekulimet e mëdha po pikërisht këtë lloj Opozite kemi. Ne duhet t’i themi ndal me forcën tonë duke organizuar partinë”– tha Gjiknuri.
