Përpjekjet e tyre për të shtrembëruar deklarata e ministrit të Jashtëm shqiptar Ditmir Bushati dhe fyerjet ndaj Çamërisë e kryetarit të PDIU-së, Shpëtim Idrizi
Gazetarët grekë që shoqëronin ministrin e tyre të Jashtëm në vizitën në Tiranë, janë shprehur me ofendime të herë pas hershme ndaj çamëve dhe kryesisht ndaj kryetarit të PDIU-së, Shëptim Idrizi. Gazetarët shqiptarë në sallën e konferencave kanë raportuar në mediat e tyre për fyerjet e kolegëve grekë.
Ndërkohë që pyetjet e tyre për ministrin e Jashtëm shqiptar kanë qënë me nota provokative. Njëri prej tyre ka pyetur ministrin Bushati për një frazë të tij, e cila lidhej me “përgjegjësitë kolektive apo individuale të secilit prej pjestarëve e të komunitetit të Çamërisë”, është fjala për akuzat ndaj kësaj popullsie për bashkëpunim me nazistët gjermanë. Gazetari grek është përpjekur ta vendosë në versionin grek deklaratën e ministrit të Jashtëm Bushati. Ndërsa një tjetër pyetje ishte e një gazetareje greke, e cila pyeti ministrin Bushati nëse Çështja Çame pengon integrimin e Shqipërisë në BE.
Ministri Bushati i ka shpjeguar gazetares se nuk e kuptonte lidhjen e kësaj çështje me integrimin. Ai tha se pyetje të tilla nga gazetarë grekë nuk të lënë shije të mira.
“Dua t’ju siguroj që nuk ka pengesë nga ana jonë që po i vëmë Greqisë, ky është një dialog, i sinqertë, jo i lehtë. Megjithë respektin për pluralitetin e mendimit e kam të vështirë të kuptoj lidhjen mes zgjdhjes së një çështje me procesin e integrimit në BE.
Prandaj megjithë respektin për pyetjen, kur vjen nga gazetarë grekë nuk të lë shijë të mirë, kur dihet që Greqia është promotore e zhvillimit integrues. Kush më shumë se Greqia është në favor të integrimit në BE të Ballkanit Perëndimor, frytet e të cilit kemi filluar ti shohim së bashku”, tha Bushati.
