Nga 27.al
Kryetari i Kuvendit Ilir Meta është përpjekur sot ta shesë procesin e zgjedhjeve në Dibër si një problem krejt lokal, i cili nuk ka asnjë reflektim në politikën e Tiranës. Në një deklaratë për mediat, Meta tha: “Zgjedhjet në Dibër nuk janë një temë kombëtare, por krejtësisht vendore. Janë zgjedhje aksidentale që po ndodhin atje. Është e rëndësishme të trajtohen si të tilla dhe lokale nga të gjitha palët. Të zhvillohen të qeta, të lira dhe të ndershme e larg tensioneve e provokimeve të panevojshme. Dega lokale e LSI-së ka marrëveshjen me degën lokale të PS- së dhe t’i qëndrojë asaj marrëveshjeje”.
Meta flet a thua se nuk e ka ai në dorë që dega lokale e LSI-së Dibër komandohet prej tij. Ai thotë në rreshtin e fundit, “dega lokale t’i qëndrojë marrëveshjes me PS-në”. Duket më shumë si një përpjekje e Metës për të mos i dhënë peshë një procesi, i cili duket se do të sjellë reflektime të rëndësishme në politikën e Tiranës. Jo se Meta nuk është i interesuar për këtë proces, por me sa duket, po përpiqet ta shesë të tillë pa interes për të deklaruar më pas se ai nuk ka dorë në asnjë skenar, ku LSI mund të sabotojë kandidatin e PS-së.
Sidoqë të shprehet Meta publikisht, gara për Bashkinë e Dibrës ka një rëndësi specifike për shumicën dhe pakicën, por me arsye të ndryshme. Për mazhorancën, është një provë e madhe që lidhet me qëndrueshmërinë e koalicionit Rama-Meta, ndërsa për opozitën është një test shumë i rëndësishëm për të kuptuar se sa është rritur apo zvogëluar në këto tri vite të qeverisjes Rama-Meta. Në garë, kanë hyrë dy kandidatë me kredite pozitive, por që hyjnë në këtë sfidë me disavantazhe që vijnë, për shkak të dy partive që përfaqësojnë.
Do të jetë pikërisht pesha specifike që ka secili prej tyre, ajo që do ta dominojë garën e Dibrës. Megjithatë, do të kenë rëndësinë e tyre përllogaritjet e votave që kanë partitë e dy koalicioneve, aleatë me PS-në dhe PD-në. Mjeku kirurg i Dibrës Muharrem Rama, kandidat i PS-së, hyn në këto zgjedhje me disavantazhin e madh; imazhin e shkatërruar të Rilindjes në Dibër përmes ish-kryebashkiakut socialist, Shukri Xhelili. Një tjetër aspekt negativ në garën e Muharrem Ramës, është edhe marrëdhënia e paqëndrueshme e koalcionit PS-LSI. Muharrem Rama është prezantuar zyrtarisht si kandidat i PS-së për Bashkinë Dibër, ndërkohë që LSI nuk ka publikuar deri tani asnjë deklaratë nëse do ta mbështesë apo jo këtë kandidaturë. Meta nuk e bëri as sot një deklaratë të tillë, kur u pyet për zgjedhjet në Dibër. Nuk tha se LSI e mbështet kandidatin e PS-së, por u përpoq ta trajtojë si një çështje lokale të izoluar nga politika e Tiranës.
Ndërsa si kandidat, Muharrem Rama, e nis garën me avantazhin e lidhjes së drejtpërdrejtë që ai ka me qytetarët e Dibrës. Si mjek e ka të garantuar një mbështetje të konsiderueshme në këtë bashki, pavarësisht se për cilën parti kandidon.
Përkundrejt tij, kandidati i PD-së Sherefedin Shehu i ka humbur lidhjet me qytetarët, pasi nuk ka jetuar atje prej më shumë se 25 vitesh dhe i mungon komunikimi i drejtpërdrejtë me elektoratin. Por, kandidati i PD-së, Sherefedin Shehu, vjen në këtë garë në Dibër si një ndër personazhet më pozitivë të së djathtës. Është pesha më e madhe që mund të zgjidhte PD në këtë qytet dhe kjo ia vështirëson garën rivalit socialist. Por ndërkohë, PD duket të jetë e përçarë në Dibër. Ish-kryetari demokrat atje ka deklaruar se nuk do të angazhohet në fushatën për kandidatin e PD-së, duke shtuar se ai erdhi si i emëruar pa marrë pëlqimin e bazës së PD-së në Dibër.
Ish-kryetari i PD-së Rahim Kaleci e ka drejtuar disa herë PD-në e Dibrës në këto 25 vite dhe me siguri ka mbështetjen e tij në elektorat, që me sa duket nuk do të shkojë për kandidatin Sherefedin Shehu. Rahim Kaleci e ka deklaruar sot në media se nuk do të angazhohet për asnjë moment në këtë fushatë. Për pasojë PD, duket e përçarë në Dibër dhe kjo mund të sjellë kosto elektorale për kandidatin Sherefedin Shehu. Megjithatë, problematika më e madhe duket të jetë brenda koalicionit të majtë.
Nëse do të vazhdojë heshtja e LSI-së për kandidatin e PS-së, pra në qoftë se nuk do të ketë mbështetje, atëherë PS-ja duhet të llogarisë vota kundër të LSI-së në garën për Dibrën. Nga përvoja e marrëdhënieve mes PS-së dhe LSI-së dimë se kur këto dy parti janë në pozicione kundërshtare, dinë mirë të dëmtojnë njëra-tjetrën, sidomos LSI PS-në. Meta dhe njerëzit e tij kanë zhvilluar beteja të shumta të “blerjes” së socialistëve qoftë elektorat i thjeshtë, qoftë struktura drejtuese në bazë, qoftë edhe deputetë. Këtë praktikë me siguri do të përpiqet ta përsërisë në Dibër më 11 shtator. Deri tani kandidati i PS-së Muharrem Rama e ka mbështetjen e deklaruar të PDIU-së dhe aleatëve të tjerë të PS-së, por ende nuk e ka atë të LSI-së. Megjithatë, pyetja shtrohet se sa do t’i vlejnë Ramës aleatët e mbetur, nëse vazhdon heshtja e LSI-së?! E vërteta është se në Dibër nuk ka shumë çamë, por ka elektorat të PDIU-së, sepse gjatë kohët e fundit ka pasur një vëmendje të shtuar të drejtuesve të PDIU-së për Dibrën. PDIU ka struktura drejtuese që funksionojnë, të cilat në Dibër kanë peshë peshë më të madhe se LSI, ndaj janë një faktor pozitiv për kandidatin Rama në këtë garë, të cilit i mungon aleati kryesor. Në zgjedhjet e fundit në Dibër, PDIU mori mbi 2 700 vota. Në këtë situatë, PS bashkë me PDIU, do të vazhdojnë këtë betejë, të cilën edhe mund ta humbasin dhe ky nuk është kiameti, por nëse e fitojnë dhe nuk është variant i përjashtuar, atëherë gara për Dibrën mund të sjellë andralla të reja mes dy liderëve të koalicionit Rama-Meta. Ndërkohë do të rikonfirmonte se opozita është ende larg performancës për të fituar gara të rëndësishme.
