“Nuk ka asnjë Jugosllavi të re, ka vetëm vende të Ballkanit, një zonë ekonomike rajonale.”
Kështu u shpreh Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi në emisionin “Fol me mua, fol me ata”, të gazetarit Enkel Demi në TVSH.
E pyetur që nëse me rikrijimin e Jugosllavisë, Shqipëria do të katandisej republikë e shtatë e saj, Ekonomi tha se në Samitin e Triestes nuk e hasi askund idenë e Kugosllavisë së re apo të vjetër.
Ajo sqaroi se zona e përbashkët ekonomike për rajonin e Ballkanit ka qenë ide e Edi Ramës dhe jo e Aleksandar Vuçiç.
Sa i përket prezantimit të Shqipërisë në Samitin e Triestes, Ekonomi deklaroi se vendi ynë shkoi me 143 projekte. Ajo tha se 15 prej tyre u maturuan, pra ishin në përputhje me rregullat konkurruese që parashikonte ky samit, ndërsa 5 prej tyre u miratuan duke bërë që Shqipëria të jetë vendi që do të gjenerojë më shumë të ardhura se vendetr e tjera pjesëmarrëse.
Ekonomi tha se ideja e një rajoni të përbashkët rajonal u hodh për të afruar Ballkanin me Bashkimin Europian, ku disa çështje do të rregullohen brenda kësaj hapësire, duke u dhënë vendeve më shumë mundësi për lëvizjen e investimeve.
Ajo nënvizoi se në Trieste triumfuan idetë e Merkel, ndërsa shtoi se pikat më të forta të Shqipërisë në bashkëpunimin rajonal janë energjia inovative, mineralet dhe turizmi.
Më tej gjatë intervistës ministrja Ekonomi tha që vendi ka shënuar rritje të investitorëve gjatë vitit 2016.
“Gjatë vitit 2016 hynë në Shqipëri 1600 investitorë të huaj dhe shumë prej tyre vinin për herë të parë në Shqipëri”, shtoi Ekonomi.
