Ndërsa vijon me protestën në ditën e shtatë përpara sheshit të Kryeministrisë në Bulevardin Dëshmorët e Kombit, kreu i PD-së Lulzim Basha i ka bërë thirrje ambasadorit amerikan në Tiranë, Donald Lu që t’i heqë vizën Edi Ramës dhe Saimir Tahirit.
Sot kryedemokrati po zhvillon bashkëbisedime me komunitetin e biznesit. Në fjalën e mbajtur ai ka akuzuar qeverinë Rama se e ka kthyer mjedisin e biznesit në Shqipëri në më të zymtin në Ballkan.
Ai është shprehur se pasurinë e këtij vendi Rama ua shpërndan 4-5 njërëzve të tij ndërsa çdokënd tjetër e konsideron armik.
Kreu i opozitës sulmoi ashpër drejtorin e Përgjithshëm të Televizionit Publik Shqiptar, Thoma Gëllçi. Sulmi publik ndaj tij erdhi pasi nëna e një mbështetjeje të Partisë Demokratike, sipas Bashës është hequr nga puna në TVSH edhe pse zotëron 4 gjuhë të huaja.
Basha: “Koha ka ardhur të zgjidhin gjuhën edhe ata që e kanë mbajtur të lidhur deri më sot. 2 miliardë euro mund të lidhin gjuhë politikanësh. 2 miliardë euro nga droga, të trefishuar thotë Antimafia italiane. Hiqni dorashkat, zgjidhni gjuhën dhe tregoni botës problemin e Shqipërisë. Përsëris thirrjen për ambasadorin amerikan: Hiqi vizën Edi Ramës, hiqi vizën Saimit Tahirit.
Investimet e huaja preferojnë çdo vend tjetër në Ballkan përveç Shqipërisë, sepse këtu është më e vështirë për të marrë një kredi apo të zgjerosh një biznes. Në Shqipëri ecin përpara vetëm 4-5 kodoshë biznesmenë që populli u thotë oligarkë, të cilët nga zyra e Edi Ramës marrin çdo ditë, thelat e mishit që është buka e gojës që u hiqet shqiptarëve. 4 ose 5 oligarkë thërret Edi Rama për çdo koncesion dhe pasuri kombëtare dhe së bashku ndajnë thelat e pushtetit dhe pasuritë e shqiptarëve, ndërkohë që vendi zhytet në mjerim. Çdo kush tjetër konsiderohet si armik.
Ne me këngë, dhe me akte paqësore, ata me pushime nga puna dhe kërcënime. Thoma Gëllçi, o pleh do të të tërheqim zvarrë nga Televizioni Shqiptar. Ora jote po vjen, ora e çdokujt që abuzon me shqiptarët, zvarrë do të hiqesh nga ai post ku të kanë vënë për t’i shërbyer interesave të korruptuara. Ta di mirë çdo kush që godet qytetarët, që godet protestën se do t’i marrim zvarrë në këtë shesh.
Doni luftë, luftë do të ketë. Qytetarët do të fitojnë. Shpojuani gomat e makinës, thejuani dritaret, nxirrini nga zyrat atyre që ju shkelin të drejtat tuaja. Ngrihuni, protestoni, reagoni.”
https://www.facebook.com/Ora.News.RTV/videos/717458575045934/
