I janë bashkur sot Partisë Demokratike rreth 200 socialistë dibranë. Ata kanë shprehur zhgënjimin e madh për partinë e tyre, braktisjen dhe mashtrimin dhe në shënjë revolte kanë grisur në mënyrë simbolike teserat e PS. Vendimi është bërë i ditur në një takim të organizuar në Pallatin e Kulturës në Peshkopi, ku i ftuar ishte dhe kryetari i PD Lulzim Basha
“Edi Rama i ka harruar socialistët. Ata enden rrugëve të papunë, pa bukë, ndërsa pasurohen vetëm një grusht njerëzish”, ka deklaruar njëri prej tyre.
Ndërsa Basha, në fjalën e tij është shprehur se, “mes aleancës me një tufë horrash dhe banditësh për të ardhur në pushtet, PD do të zgjedhë gjithmonë aleancën me shqiptarët e ndershëm dhe socialistët e ndershëm”.
“Sot na bashkon një hall i madh që ka kapur jo vetëm degën e socialistëve të Dibrës, por anembanë Shqipërinë. Sepse një grusht njerëzish, jo sicialistët, vendosin kush do punësohet, kush merr tenderat, kush merr pasuritë e shqiptarëve”, ka deklaruar Kreu i PD-së.
Basha ka akuzuar edhe kandidatin e majtë për Dibrën, i cili sipas tij “nuk është kandidat i PS, por i një allishverishi që dorëzon me letra 50 për qind të pushtetit”.
“Dhe nesër do jetë 60, 70% derisa ta marrin në dorë bandat kriminale. Qindra socialistë na kanë çuar mesazhe ku na bëjnë me dije se do të bashkohen si shqiptarë rreth kandidaturës së Sherefedin Shehut, për t’i dhënë Dibrës menaxherin e duhur dhë për të mos e lënë në dorë të bandave”, ka vijuar Basha.
