Nga Ermir Hoxha
Ekziston një bestytni popullore, sipas së cilës, atij që sheh të pasmet e tjetrit i bien dhëmbët. Të vegjël, mu në atë moshë që na binin dhëmbët organikisht për daljen e të tjerëve, ballafaqoheshim dhe me romuzin e të mëdhenjve se të pasmet e kujt kishim parë që e kishim pësuar në atë mënyrë, e që, pra, e kishim shëmtuar veten.
Dhe duke besuar për një çast që vërtet është kështu, e mërkura qe një përjetim fatal për disa drejtues portalesh e shikuesish të tyre që mbetën pa dhëmbë në gojë teksa shqyen sytë për të parë të pasmet anti-sexy të një personi që po falej në xhami, për të cilin u përfol se qenka një figurë publike e politikës, qeveritar lokal me emër i një qyteti të Kosovës.
Ishte e sforcuar përpjekja për t’i gjetur një diçiturë asaj, për të gjetur pra një arsye se pse i duhej servirur publikut. Ishte i njëjti sforcim si me të pasmet e aluduara të një politikaneje shqiptare publikuar verën e kaluar, ku do duhej një shkrim me një kritikë acide i Artan Lames ndaj mediave online që këto të fundit të ndalnin hapin nga marria e përhapjes së një fotoje krejt pa kuptim – tipik “kërma” që u lëshohen lexuesve “hiena” – dhe jo thjesht për shkak se në foto nuk ishte ajo për të cilën aludohej.
Eshtë e vërtetë që pamje të tilla në xhami nuk janë të hijshme. Dhe sikur fotoja të shoqërohej me këtë diçiturë, pa e përmendur emrin e personit me të pasmet në një gjysmëcullakëri, do ishte krejt e justifikuar.
Se vërtet, skena të tilla pa pikë erotizmi, e që për më tepër ta shpifin – të lënë dhe pa dhëmbë! – mund t’i hasësh në ambiente krejt të tjera, sidozot në servise automjetesh, por assesi në një vend ku robi shkon të adhurojë Zotin, e që për këtë arsye duhet të jetë korrekt në pamje, veshje, qëndrim e komunikim.
Por ata që e ofruan për publikun nuk shkojnë aq larg. Derisa nuk e kanë për dert t‘u bien dhëmbët e të shëmtohen, do të thotë që janë bërë njësh me të shëmtuarën, e nuk e dallojnë dot më nga e kundërta: e bukura!
P.S: Për një qytet në Shqipëri, thuhet se atje të rinjtë i heqin vetë dy dhëmbët e parë. Ndodh kjo pasi është trend të dukurit sa më shumë gango, lac, siç thotë Kel Demi, hekës; e ku cv-ja që të bën krenar është ajo me ca vite burg për vrasje me motiv nderi, sidomos në rrethin e ngushtë familjar. Por kjo nuk mund të ndodhë dhe pa qenë pak i frikshëm. Dhe mungesa e dy dhëmbëve ta plotëson dhe “zbukuron” këtë portret makabër. Të mërkurën, disa mediave online u ranë dhëmbët dhe nga krenaria makabre e të qenit gango, lac, hekës, i fortë lagjeje… /tesheshi.com/
