Bota është realisht e vogël për të thënë fjalën e fundit në fillim. Alban Meha bëri një kampionat të shkëlqyer në Turqi me Konyaspor dhe skuadra e tij fitoi në fund të edicionit në vend në Europa League. Por një gjë e tillë nuk ishte kriter, që mesfushori ta rifitonte një vend në ekipin Kombëtar. Trajneri De Biazi, për një arsye që nuk dihet ekzaktësisht, nuk e do më në skuadrën e tij. Thuhet për impenjim të pamjaftueshëm në seancat stërvitore, por një variant është se u largua një herë nga grumbullimi pa arsye shumë të forta. Gjithsesi të gjitha janë hipoteza, ndërsa një gjë është e konfirmuar, deklarata e trajnerit italian: “Sa të jem unë, Meha nuk do të jetë më në kombëtare”.
Pas Euro 2016, ka shumë gjasa që De Biazi të transferohet në Arabinë Saudite, për një kontratë “faraonike”, nga e cila do të përfitojë rreth 1.5 milionë euro në vit. Dhe nëse kjo ndodh, pikërisht tek Al Nasr do të gjejë Alban Mehën, madje ky i konfirmuar, pas kalimit nga Konyaspor për një pagë vjetore mbi 1 milionë euro. Pra në Arabi, De Biazi që do të gjejë një bashkëkombas, ose do “të puthet” sërish me Mehën si në kohët përpara mllefit, ose do t’i vërë të njëjtin kusht presidentit të Al Nasr (o unë, o ai), i cili quhet Princ Faisal Bin Turki Bin Naser.
