Deputeti Dashamir Shehi, kreu i LZHK-së, ka folur sot për situatën politike në vend. Referuar raportit të DASH për çështjen e korrupsionit në vend, ai tha se të gjithë protagonistët e politikës duhet të marrin si një paralajmërim të rëndësishëm. Sakaq, ai theksoi se e sheh atë raport si një thirrje për ndryshimin e qeverisë. “Pamë raportin e DASH është më i zi se përherë, zotëria Rama thotë që është “copy-paste” i vitit të vjetër por edhe nëse është “copy-paste” por në realitet është “black-paste”. Ne nuk jemi në gjendje ti përgjigjemi si opozitë, raporti i DASH i bën thirrje popullit shqiptar që ka ardhur koha që Shqipëria të ndryshojë drejtim. Nuk e di ca suksesi ka kjo qeveri që të mburret”, tha ai.
Lidhur me krizën brenda PD, Shehi u shpreh se çfarë do të ndodhë më vonë është e vështirë ta gjesh pasi këta e kanë kthyer në një krizë të 2-3 vetave, por në realitet kriza është për mënyrën si është qeverisur PD gjithë këto vite me radhë.
“Zgjedhjet nuk janë bërë kurrë me korrektësi dhe sot jemi në të njëjtën vorbull. Grupi i Berishës është më i madhi që duan të bëjnë një Kongres siç bëri Basha në korrik një kongres, as këta nuk e bëjnë dot këtë punë. Këta mendojnë që Rithemelim është ribashkim i grupit të Berishës me grupin e vet, për të bashkuar komponentët e tjerë opozitarë. Kjo punë do të mbyllet më datën 30 prill. Do të ketë një grup më të madh përqark Berishës, por kjo është një rrugë në malore. Nuk e shikoj bashkimin e madh të demokratëve”, u shpreh Shehi.
Ndërkohë, lidhur me zgjedhjen e presidentit të ri Shehi theksoi se mazhoranca po bën propagandë me publikimin e emrave kandidatë për të tërhequr vëmendjen e publikut nga skandalet dhe krizën e çmimeve në vendin tonë. Gjithashtu Shehi bën me dije se kriza brenda PD-së pritet të mbyllet pas datës 30 prill, por në horizont nuk shikon bashkimin e madh në kampin opozitar.
