Shumë e pabesë kjo sëmundje… Sot, në orët e para të mëngjesit ka ndërruar jetë Hektor Sejko, kryetar i Shoqatës “Çamëria”. Jeta e tij shkoi e tëra në persekutimin më të rëndë të rregjimit komunist, por kjo nuk e rrënoi asnjëherë shpirtin e tij optimist, dëshirën për të jetuar.
Hektor Sejko pjesën më të madhe të jetës e kaloi në qytetin e Shkodrës, ku familja e tij u vendos pas arrestimit të të atit, gazetarit Taho Sejko, të cilin e pushkatuan komunistët dhe të afërmit nuk ia gjetën dot kurrë varrin.
Hektor Sejko ka qenë përherë një aktivist antikomunist, por mbi të gjitha veprimtar i Çështjes Çame. Falë këtij kontributi së fundmi ai u zgjodh kryetar i Shoqatës “Çamëria”.
Hektori ndërtoi një familje të mrekullueshme, ku tre djemtë e tij janë Elvis, Irtan dhe Genc Sejko.
