“Mosmarrëveshjet kufitare për Shqipërinë”, është diçitura që shoqëron kariktaturën e kohës, kur ndaheshin territoret shqiptare ndërmjet fqinjëve.
Studiuesi Armand Plaka ka publikuar një karikaturë, ku reflektohen “hesapet” mes fqinjve të Shqipërisë për copëzimin e saj pas konferencës së Londrës në vitin 1913. Karikatura është botuar në mediat finlandeze dhe i përket vitit 1913. Studiuesi dhe gazetari Armand Plaka e ka publikuar në facebook bashkë me një sqarim rreth karikaturës.
“Mosmarrëveshjet kufitare për Shqipërinë”. Kjo është diçitura e karikaturës së botuar në janar 1913 në faqet e shtypit finlandez në lidhje me diskutimet pa fund për ravijëzimin e vijës kufitare të shtetit të ri shqiptar, menjëherë pas shpalljes së pavarësisë nga ana e vetë shqiptarëve dhe pritjes për njohjen ndërkombëtare, që do të vinte pas Konferencës së Londrës, rreth 6 muaj më vonë. Megjithëse njohja tashmë nuk do të vihej më në diskutim, madje edhe forma e regjimit, sipërfaqja e territorit që do të duhej të zinte shteti më i ri i kontinentit, do të bëhej objekt i pafund debati mes fuqive të mëdha.
Sidoqoftë, ata konkluduan në fund me një vendim drastik për të kënaqur kësisoj orekset e fqinjëve veriorë e jugorë të shqiptarëve, duke hequr atyre shumë pjesë vitale të territoreve të tyre, si dhe të drejtën për të jetuar të bashkuar. Karikatura në fjalë e pasqyron më së miri këtë debat, duke nxjerrë në pah veçanërisht qytetet apo rajonet (Peja, Shkodra, Janina, Gjakova, Prizreni e Kumanova) që u prekën nga kjo ndarje, e cila ka sjellë pasoja të pariparueshme ndër shqiptarët edhe sot e kësaj dite.”
